Alishan Tsou Language

100年
臺灣原住民族語朗讀比賽 (鄒族阿里山語) 國小學生組學 編號1號
[PDF]

atva’esa umnua ci nanghia

’enanghia’u eni,zou oko no puutu,mimia iepoepohu i’upu to isi pa’cohivi to h’oe’ea “cou” a’toana,lamia, maezo noepohu, ho mimia baito to tposu. mo totiski ‘olamia umnua hioa, ko’kolamia na’no “nanghia”。

la’u maezo na’no kaebu, eocoyu tomo mav’ov’o ci matpotposu. panto h’oe’ea, ci isi yainca; “hote mia’emo mav’ov’o, ho covhi ci ceonu,la conino ahoi, eocoyu tomo mav’ov’o ci tposu”,tenano elua na teko, ocia mia ci ceonu no ataveisi. ’emo maica ci pat’ausna,isi eusvuta ho tetola, utasva, huemuhi ‘oafu’u, matpotposu 。

upena no tposu no bua “cou” ho “bua puutu”,la’u acuha, soekaebuneni ausvuta‘e afu’u, h’oe’ea ta yatatiskova。

la titha yupepeahnguyu,ho tousfusfutu. hoci man’i nate ta’hongi cimo mav’ov’o ci h’oe’ea, te na’no koa umnu ta iachi ‘emo maica ci a’a’ausna. ko’kola’u, acuha, ausvuta ‘o afu’u, h’oe’ea ta yatatiskova。

avaho’o, iachi h’oe’ea ta cou a’toana. isi “taotofsi’ia” ta acucuhu’o ongko ta “psoseongana”,kuzo hoci o’teamko meelu ta h’oe’ea “cou”a’toana. ko’kola’u na’no pumemealu ho isi pa’cohivi bua “cou”to”lemocohio”, te’ola ko’ko tmahongu hotela yupepeahnguyu. zou eni’o, os’o atuhca, koa ausvutu ta h’oe’ea cou a’toana。

‘o ino ho amo’u, la’so huhucmasi, ahoi homon’a na’no taseona; ho ac’uhu, homicu ‘eyopsi; ho ngoseo ci yaahioa ho aut’uca a’mia. la a’umtu huhucmasi na’no man’i ci hioa ‘o maameoi’u,ko’ko uk’a ci, hiesi no bumemeala, pa’cohivi no bua cou. te’ola bumemealu, ho la’un'a seolua no tmopsu。

abohtu pantola yonta ‘oyonatmopsu, cila ma’cohio,bua cou ci lemacohio,la boemi to, himcocoveoisi, ho bumemeala, pa’cohivi bua cou. isi pa’kihoi to tposu no tma cou,hocu poa, ausvuta, tposi, imiacu ake’a, peela engha, ho tposi, maitan’e 。

ta’esi, cu, ahoza, pa’cohivi momaemaezo, bua cou ho ya’ei. maitan’e, la’ucu, honga’o tposu, ho peela tposi ho macoconi’o os’o, ta’hongi ci e’e no cou, ko’komi’ocu ake’i tmahongu no buo cou maitan’e。

’o nanghia’u no puutu, isi afnasa soekaebuneni’e h’oe’ea cou a’toana! ho mimia seolua no uk’a hioa,tamiacu, noepohu ho, ausvutu yuptot’ingi bua cou ho aomotu’u. la’u aiti’o nanghia’u, micu na’no ausuhcu meemealu bua cuo 。

la’u, iacia yainca no‘koe’u! zou anana’o cou a’o, mate meemeauhe, ta oko no puutu no a’umtusi! ‘ateno koe’i to lemacohio hici o’te amaka, tosa’vi’e oko no puutu 。

ta’ula, akoyu no maezo, lemacohio, bua cou no ataveisi, ko’koteola, bumemeala, hioa na isi, iachia, umnua no ataveisi。

moc’oso, coni’e nsou ta macicihi!, ko’kotela momaemaezo yaahioa, note koa, umnu ta iachi no ataveisi. ‘eisi afu’a iachia mia ci ceonu, uk’a cite meele, aha’o mici ti’eingi, tamo maica ci a’a’ausna 。

os’o yaeza poa, cohivneni to nanghia’u, ‘emo maica ci to’hungu’u 。

te’o p’okuneni’o lemacohio’u ‘aveoveoyu。