張逸嫻 Tiunn Ia̍t-hân
黃金雙港 幸福海墘
N̂g-kim siang káng, hīng-hok Hái-kînn
----------------------
大安舊名海翁窟，歷史輝煌有藝術。
Tāi-an kū miâ Hái-ang-khut, li̍k-sú hui-hông ū gē-su̍t.
外海航行的船隻，看見海翁的尻脊，
guā-hái hâng hîng ê tsûn tsiah,khuànn kìnn hái-ang ê kha-tsiah,
隨後倚近詳細看，原來就是鐵砧山。
Suî āu uá kīn siông sè khuànn,guân lâi tiō sī Thi̍h-tiam-suann.
落尾閣叫螺絲港，親像一隻海螺殼，
Lo̍h-bué koh kiò lōo-si-káng, ,tshin tshiūnn tsi̍t tsiah hái-lê-khak.
大船出入揣路縫，船隻安全來靠港。
tuā-tsûn tshu̍t-ji̍p tshuē lōo phāng,tsûn tsiah an-tsuân lâi khò káng.
大安海墘塭寮庄，美麗海岸長長長，
Tāi -an Hái-kînn Ùn-liâu-tsng,bí lē hái huann tn̂g-tn̂g-tn̂g.
溪口塭寮紅樹林，用心保育插插插，
Khe-kháu Ùn-liâu âng-tshiū-nâ,iōng sim pó iok tshah-tshah-tshah,
沙蟹花鮡海雷公，沙埔傱甲狂狂狂，
Sua-hē hue-thiàu hái-luî-kong,sua-poo tsông kah kông-kông-kông,
海岸寶貝水筆仔，生湠密密紅樹林，
Hái-huānn pó-puè tsuí-pit-á,sinn thuànn ba̍t-ba̍t âng- tshiū-nâ,
麻黃粿樹倒地鈴，毋驚風雨真正猛。
Muâ-hông kué-tshiū tò-tē-lîng,m̄ kiann hong hōo tsin tsiànn bíng,
蘆竹菅芒白翎鷥，看甲目睭瞇瞇瞇。
Lôo-tik kuann-bâng pe̍h-lîng-si,khuànn kah ba̍k-tsiu bi-bi-bi..
濕地罕有真稀奇，珍貴大安水棕蓑，
Sip-tē hán-iú tsin hi-kî,tin-kuì Tāi-an-tsuí-tsang-sui,
水鳥毛蟹賞袂離，夕陽留戀海連天。
tsuí-tsiáu môo-hē siúnn buē lī,sik-iông liû-luân hái liân thinn.
海墘國小荷花池，清新優雅好情意，
Hái-kînn-kok-sió hô-hue-tî,tshing-sin iu-ngá hó tsîng ì,
白荷愛媠滾紅墘，通人呵咾無地比。
Pe̍h-hô ài suí kún âng kînn,thong lâng o-ló bô tè pí.
生態保育有用心，歡迎貴客來光臨，
Sing-thài pó-iok ū iōng-sim,huan-gîng kuì-kheh lâi kong-lîm,
黃金雙港花上錦，幸福海墘歌詩吟。
N̂g-kim siang káng hua siōng gím,hīng-hok Hái- kînn kua si gîm.
No comments:
Post a Comment